Челси се повлекол од контроверзен трансфер поради страв од реакција од УЕФА

Премиерлигашите беа вообичаено активни во летниот преоден рок, а повторно се издвои Челси кој инвестираше над 200 милиони фунти, а не успеа да го исчисти составот од сите прекубројни фудбалери.

Во последен момент заминаа играчи како Стерлинг, Броја и Чалоба и тоа на едногодишни заеми, а интересно Челси решил да се откаже од еден најавен контроверзен трансфер.

Деивид Вашингтон требаше да замине во редовите на Стазбур, клуб кој има исти сопственици како и Челси, а премиерлигашот требаше да заработи дури 21,5 милиони евра.

Се било договорено за овој трансфер на бразилскиот интернационалец, биле закажани и прегледи, но Челси решил да се повлече од идејата поради реакциите за легитимноста на финансискиот пакет и можноста да заработи казна од УЕФА.

Проблемот е во тоа што на Челси му беа потребни околу 20 милиони евра за да избегне нарушувања на правилата на финансискиот фер плеј, па откако трансферот пропадна, раководството мораше да прави други комбинации и да се откаже од фудбалери кои добиваа високи плати.

УЕФА и ФИФА веќе биле алармирани откако претходно Диего Мореира замина од Челси во Стразбур за 9 милиони евра, а веројатно толку спорни нема да бидат позајмувањата на Ѓорѓе Петровиќ, Андре Сантош и Калеб Вајли во редовите на францускиот клуб.