Чави: Фудбалот носи многу големи неправди, а една е онаа со нашиот капитен

Серхио Бускетс оваа недела ја информираше јавноста дека нема да го продолжи договорот со Барселона и дека става крај на незаборавната етапа која траеше 15 години, вест која нималку не го израдува тренерот на првиот тим, Чави Ернандес.

Чави со сите сили се обидуваше да го убеди Бускетс да остане најмалку уште една сезона на „Камп Ноу“, но откако мораше да се помири со конечната одлука на поранешниот соиграч, најавата на дербито со Еспањол ја искористи за да испрати низа комплименти на негова сметка.

Ернандес нагласи дека Бускетс бил најинтелигентниот фудбалер со кој го делел теренот во својата играчка кариера, а истовремено посочи дека голема неправда било тоа што никогаш не ја добил „Златната топка“.

– За Бускетс е многу важно да си замине со титулата во Ла Лига, да се чувствува важно и ценето. Неговото заминување ќе се одрази врз тимот, но мора да ја почитуваме неговата одлука. Тој е пријател, најинтелигентниот играч со кој сум играл на теренот. Беше чиста 10-ка во се што правеше. Тој е најдобриот дефанзивен играч за врска во историјата на Барселона.

– Не сум видел подобар од него, кога не добиваше номинации за „Златната топка“, тоа ми изгледаше на голема неправда. Фудбалот носи големи неправди, а една е онаа со нашиот капитен. Сите велите дека најдобри играчи за врска сме јас и Иниеста, но тука би го ставил и Бускетс, – потенцира Чави.