Целосен контраст од Чави: Педри посочи во кој сегмент Барселона најмногу напреднала под водство на Флик

Ханси Флик брзо ја примени својата методологија во Барселона и успеа за кратко време да го добие она што посакува, нешто што слободно може да се каже по четири одиграни официјални меча во Ла Лига.

Иако сезоната е многу долга и ќе биде исполнета со безброј препреки, добриот старт на кампањата дефинитивно ги крева моралот и самодовербата кај тимот, а тоа прави да гледаме повеќе разиграни фудбалери во четата на германскиот стручњак.

Педри кој лани се мачеше со повреди, сега вели дека се чувствува физички многу подобро со тренинзите на Флик, но говорејќи и за тимот како целина, потенцира дека Барселона посебно напреднала токму во тој сегмент.

Барса често знаеше да остане без сила и енергија во завршната фаза од мечевите минатата сезона, но за разлика од ерата на Чави, сега гледаме целосен контраст во последните 20 минути од средбите на кои игра каталонскиот гигант.

– Физички сум многу подобар од лани и тоа прави разлика на теренот. Флик е многу добар околу физичката подготовка и ни дава самодоверба на секаков начин. Сега во тимот работиме многу понапорно од претходно. Кондициските тренери кои дојдоа со Флик имаат многу поголеми барања и извонредно си ја вршат работата. Работиме многу напорно, а после тоа се пресликува на натпреварите. Тимот сега не паѓа после 70-та или 80-та минута, одржуваме ист ритам во текот на цел меч.

– Таму има најголем напредок, дури и за нас кои подоцна се вклучивме на подготовките. Се користи многу повеќе сила, имаме многу повеќе вежби за кои ви е потребно да употребите физичка сила. Сепак, не се осврнува само на тоа, Флик е многу отворен и близок со играчите. Изгледа премногу сериозно, но знае и да се шегува. Им помага многу на сите, секогаш внимава што бараат играчите. Точно е дека понекогаш изгледа како наредник, но има и мека страна во себе, особено кога зборува со играчите, – открива Педри.