Целиот приход од дуелот Македонија-Велс ќе биде наменет за семејствата на настраданите во трагедијата во Кочани

Македонската фудбалска репрезентација за неколку дена ја очекува и вториот меч во квалификациите за Светското првенство, прв на домашен терен против селекцијата на Велс.

Тоа е дуел закажан за 25 март на националната арена „Тодор Проески“ во Скопје, натпревар кој ќе се игра во вечерниот термин од 20:45 часот, а истиот ќе има и хуманитарен карактер.

Имено од ФФМ информираа дека сите средства, приходи собрани од мечот ќе бидат наменети за семејствата на настраданите во несреќата во Кочани.

-Сакам да ја информирам јавноста дека приходот од натпреварот против Велс целосно ќе биде пренасочен за настраданите во трагедијата во Кочани. Тоа е најмалку што можеме да направиме во моментов, -порача првиот човек на ФФМ, Масар Омерагиќ.