Цана: Не знам како УЕФА дозволува да играме против Србија

Ждрепката за квалификациите за Светското првенство се одржа на крајот на минатата недела, а судбината посака во иста група да се најдат две омразени репрезентации, оние на Србија и Албанија.

Последната нивна пресметка на европско ниво донесе голем скандал и политичка провокација на натпреварот кој се одигра во Белград, па поради тоа, најавените два натпревари во групната фаза уште отсега се окарактеризирани како мечеви од висок ризик и јасно е дека ќе има големо нетрпение меѓу двете страни.

Лорик Цана беше дел од натпреварот кој се одигра пред десет години, а сега како важен член од фудбалскиот сојуз на Албанија, вели дека УЕФА прави огромна грешка што дозволува вкрстување на две селекции и две земји кои имаат познати политички конфликти од минатото.

– Верувам дека ниту едната, ниту другата репрезентација не сакаат повторување на сцените од пред десет години. ФИФА и УЕФА имаат правила да се забрануваат натпревари на земји кои се во директен конфликт и кои имаат одредени политички разлики.

– Иако нашите две земји во моментов не се во директен конфликт, јас сметам дека не е логично да играм против Србија во иста група за Светското првенство. Односите кои ги имаме со Србите како народ и некои деликатни процеси ја прават целата увертира многу тешка. Ова го велам поради конфликтот за Косово за кој се уште нема вистинско решение, – потенцира Цана како актуелен претставник на фудбалскиот сојуз, но и поранешен капитен на репрезентацијата на Албанија.