Буфон избра најдобар играч за време на кариерата: Требаше да освои пет „Златни топки“

Џиџи Буфон освои многу трофеи за време на долгата и успешна голманска кариера, а во неа имаше можност да биде соиграч на голем број истакнати фудбалски имиња.

За време на последниот натпревар на италијанската репрезентација, актуелниот директор на националниот тим зборувал на поинакви теми, а од него било побарано да биде издвоен најдобриот играч со кого или против кого имал можност да настапува.

– Играв со три генерации на фудбалери. Како да изберам, тука меѓу другите беа и Зидан, Роналдо, Меси, Иниеста, Кристијано…

– Мислам дека Нејмар беше најдобар и требаше да освои пет „Златни топки“ поради тоа каков фудбалер и личност е“ – рекол Буфон.

Италијанскиот голман се потсетил и на нивниот заеднички сон да ја освојат Лигата на шампионите со ПСЖ.

– Победивме со 2:0 во Манчестер против Јунајтед, па добив впечаток дека не се подготвуваме најдобро за реваншот. Но, не реков ништо, затоа што јас бев нов во тимот, а таму имаше многу шампиони. Примивме гол поради грешка на одбраната, втор поради моја несоодветна интервенција, а на крајот и трет гол по кој бевме елиминирани. Не бевме добро подготвени, – истакнал Буфон.