Бруно за новиот португалски бисер: Би сакал да го имам блиску до мене во Јунајтед

Бруно Фернандеш без никаков сомнеж е најдоброто засилување кое го имал Манчестер Јунајте во последните десет години, па поради тоа, оперативците на клубот се почесто гледаат перспективни фудбалери од Португалија и скаутираат играчи кои допрва треба да се покажат во вистинско светло.

Капитенот на Манчестер Јунајтед е клучен дел и од португалската репрезентација која е исполнета со голем број фудбалски таленти, а последниот е Жоао Невеш кој почна да добива шанси во Бенфика по заминувањето на Енцо Фернандез, па неодамна стана и репрезентативец.

Талентираниот фудбалер на Бенфика е новиот португалски бисер и дебитираше за националниот тим на средбата во Босна и Херцеговина пред еден месец, но доби неколку минути и против Лихтенштајн пред неколку дена. Последните информации велат дека Јунајтед го скаутира 19-годишниот играч за врска и подготвува понуда, а зелено светло за такво нешто дава и Бруно.

– Менаџерот на Манчестер Јунајтед е тој што треба да каже дали има место за него во тимот, или не. Тој е фантастичен играч, но не зависи од мене, зависи од идеите на тренерот.

– Тоа што можам да го кажам е дека е фантастичен професионалец и извонредно дете. Ќе има светла иднина каде и да оди. Би сакал да го имам блиску до мене во Јунајтед, бидејќи се работи за играч кој има големи квалитети и светла иднина. На крајот, од него зависи како ќе се развива, јас му посакувам се најдобро како постар колега, – изјави Бруно.