Бруно капитенски го заштити Онана по новата катастрофална грешка на голманот (Видео)

Андре Онана ги натера навивачите на Манчестер Јунајтед да подзаборават на неговите киксови со одличните изданија кои ги имаше од стартот на сезоната, но сега во период од неколку дена двапати потсети на својата најлоша верзија.

Голманот на Манчестер Јунајтед прими гол кој не смее да се прими на натпреварот против Нотингем Форест во Премиер лигата, додека денеска со лош избор и катастрофален пас и дозволи на Викторија Плзен да поведе во Чешка.

За среќа на Онана, Бруно Фернандеш и Расмус Хојлунд се погрижија неговата грешка да не биде фатална, па овој двоец се погрижи за пресврт и прва победа на Рубен Аморим на гостински терен како менаџер на Јунајтед.

По натпреварот, Онана повторно е мета на сериозен потсмев на социјалните мрежи за примениот гол, па Бруно реши капитенски да го одбрани и да префрли дел од вината и на Де Лихт.

– Ние сме тие кои сакаме акциите да ни почнуваат од голманот и во такви услови, секој потег треба да биде точен. Онана денеска мислеше дека Де Лихт ќе се приближи кон топката, но на крајот испадна лош пас и тие постигнаа гол. Ова не е грешка на Андре, ова е грешка на целиот тим.

– Тука не гледаме индивидуални грешки, ние продолжуваме да имаме максимална доверба во Андре. Тој е паметно момче и знае дека немаше добар потег, но тој ќе ни помогне на многу натпревари во иднина со квалитетот кој го поседува. Грешките се дел од фудбалот, без грешки, нема да гледаме голови. Најдобра вест е што покажавме истрајност, успеавме да се вратиме и да стигнеме до победа, – изјави Фернандеш.