Британски милијардер одбил да го купи Ливерпул и ќе се фокусира на Манчестер Јунајтед

Сценариото дека Ливерпул и Манчестер Јунајтед ќе бидат на продажба во ист момент беше нереално до пред неколку недели, но славните англиски клубови многу скоро може да добијат нови сопственици.

Газдите на премиерлигашите потврдија дека се отворени за влез на нови инвеститори, а во овој процес се вклучени и реномирани банки, кои претходно му помогнаа на Челси да дојде до наследник на Роман Абрамович.

Ливерпул веќе му бил понуден на британскиот милијардер Џим Ретклиф, но тој одбил ваква опција и ќе се концентрира на евентуално купување на Манчестер Јунајтед.

Иако и Ливерпул е профитабилен бизнис, Ретклиф сега размислува само за Јунајтед бидејќи е голем фан на овој клуб, па нема да биде изненадување ако дојде до акциите на „црвените ѓаволи“.

Сопственикот на гигантот „Инеос“ веќе раководи со францускиот прволигаш Ница, а имаше обид да го купи и Челси, потег кој го објасни со фактот дека тогаш не очекувал дека Јунајтед ќе биде достапен во брзо време.