Браво со брутална паралела на Барселона и Сити: Барса функционира како мал клуб!

Клаудио Браво е фудбалски активен и на 41-годишна возраст и беше дел од последното издание на Копа Америка, па во ситуација кога не планира да стави крај на кариерата, чека нов предизвик и во петтата деценија од животот.

Браво во својата богата клупска кариера ги бранеше боите на клубови како Барселона и Манчестер Сити, но во обидот да направи една паралела меѓу шпанскиот и англискиот клуб за работата во последните години, Чилеанецот голема предност му дава на англискиот шампион.

– Барселона функционира како мал клуб. Надворешно гледано, Барселона е огромен клуб, гигантски голем клуб. Барселона и Реал Мадрид се најголеми клубови на светско ниво, најпознати во целиот свет. Барса е гигант и во Азија, во Америка и на било кое место во светот, но внатрешно гледано, клубот не функционира добро. Барселона функционира како мал клуб, секогаш ги имате истите лица, има малку вработени. Истите играчи, истите лица, три или четири обезбедувачи, кувари и уште неколку други…….

– Од друга страна, Манчестер Сити внатрешно функционира како гигантски клуб. Тука мислам на условите, ресурсите кои ги нуди. Имате неограничени ресурси во тој клуб. Има многу луѓе кои внимаваат на вас додека сте во базен, има многу луѓе од медицинска област, во теретана. Не штедат на ресурси и на персонал за да се обезбедат најдобри услови за играчите, тие се трудат да не недостасува ништо, – вели Браво во интервјуто за „Ел Легадо“.