Босанецот Муслиќ откри какво изненадување добил од Гвардиола по крајот на мечот

Манчестер Сити се намачи за да го елиминира Плимут и мораше да прави пресврт на „Итихад“, но откако избраниците на Пеп Гвардиола ја завршија работата навреме, дојде на ред и традиционалното ракување меѓу двајцата менаџери.

Гвардиола како добар домаќин се погрижи за крајно џентлменски однос кон Мирон Муслиќ, а Босанецот со австриски пасош на англиските медиуми сега им откри и каков третман добил од неверојатниот Шпанец во неговата канцеларија на „Итихад“.

Менаџерот на Плимут по сензационалната победа над Ливерпул изјави дека ќе ја прослави истата со начос и Фанта, но оваа негова реченица очигледно некој му ја пренел и на Пеп, кој уште пред натпрварот му го порачал на својот колега следново:

– Заборави на вино, ќе те чека Фанта во мојата канцеларија…….

Оваа приказна ја потврди и самиот Муслиќ, кој дополнително им обелодени на новинарите дека минал извонредни 45 минути во канцеларијата на противничкиот менаџер.

– Минавме 45 минути во неговата канцеларија по крајот на натпреварот и имаше подготвено Фанта за мене, како и навистина големо шише италијанско вино за мојот стручен штаб. Навистина уживав во негово друштво, уживав во гостопримството од еден од најдобрите тренери во историјата. Тоа беше незаборавно искуство за мене, – открива Муслиќ.