Борусија потврди дека Белингем заминува во Реал и откри колку „тежи“ трансферот (Фото)

Џуд Белингем во наредните неколку дена ќе биде претставен како прво бомбастично засилување за Реал Мадрид за новата натпреварувачка сезона, вест која официјално ја потврди и неговиот досегашен клуб, Борусија Дортмунд.

„Милионерите“ на крајот попуштија под притисокот и со официјално соопштение ја известија јавноста дека Англичанецот е пред преселба во „кралскиот клуб“, откако двете страни постигнале конечен договор за висината на отштетата.

Трансфер сумата надминува 100 милиони евра и фиксната исплата ќе изнесува 103 милиони евра, а Борусија може да заработи и дополнителни 30 проценти од првичната сума ако се остварат одредени бонуси.

Англискиот репрезентативец ставил потпис на шестгодишен договор со Реал и ќе биде идната голема ѕвезда на тимот, што е прва супер вест за фановите кои во неколку дена се збогуваа со Асенсио, Азар, Маријано и Бензема.

Белингем дефинитивно ќе биде огромно засилување за Реал во средниот ред, а според сите најави, следна мета на Флорентино Перез е Хари Кејн и пополнување на дупката која ја остави Бензема.