Борусија ни понуди дефиниција за контра: Халанд, Ројс и Санчо презентираа шах-мат во три потези (Видео)

Борусија Дортмунд е првиот патник во полуфиналето на германскиот Куп, откако вечерва во големото дерби ја победи Борусија Менхенгладба на гостински терен со минимални 0:1.

Двата тима имаа свои шанси и може комотно да се каже дека домаќините имаат за што да жалат, особено за ситуацијата во 59-та минута кога голманот Хиц маестрално реагираше и ја сочува мрежата на Дортмунд.

Пред да се случи тоа, му беше оправдано поништен гол на Ерлинг Халанд поради прекршок пред да ја затресе противничката мрежа, па во таква ситуација, како одлучувачки се покажа моментот во 66-та минута.

Во моментите кога домаќините се обидуваа да направат притисок, гостите од „Сигнал Идуна парк“ режираа страшна акција која може да послужи како дефиниција за контра напад, по која Џејдон Санчо погоди за 0:1.

Шулц заврши голема работа и ја пренесе топката од својот шеснаесетник до средината, а потоа следеше шах-мат во три потези. Дефанзивецот ја проследи топката до Халанд, овој додаде до Ројс, по што капитенот го проигра Санчо кој погоди откако излезе сам пред противничкиот гол.