Бонучи: Ме изненади глупоста која ја кажа Шчесни

Леонардо Бонучи направи долго интервју за „Прајм видео“ и одговори на теми кои се беа недопрени од медиумите, бидејќи покрај тоа што откри дека караниците со Макс Алегри започнале уште во 2017-та година, го искористи обраќањето за да му одговори и на порашен соиграч.

Војчех Шчесни беше доста актуелен за медиумите во периодот кога замина во пензија и самиот откри дека му било преку глава од долгите говори на Бонучи, па често знаел да отиде во тоалетот и да си стави кацига на главата за да не го слуша стоперот.

Оваа изјава на Полјакот беше хит во Италија пред неколку месеци, но Лео сега реши да му одговори на голманот кој си го погази зборот и се врати на фудбалот за да биде резерва во Барселона.

– Ме повредија зборовите на Шчесни, јас секогаш зборував за доброто на тимот. Кога јас зборував, тој речиси никогаш не беше тука, секогаш беше заклучен во тоалетот и сите знаеме што правеше (пушел цигари).

– Го кажа тоа за кацигите на глава кога реши да се пензионира, но потоа се врати на фудбалот. Како што стојат работите, тој е целосно збунет, навистина ме изненади глупоста која ја кажа во јавноста, – открива Бонучи.