„Бомба“ по историскиот успех во Лигата на нации: Сејдини си поднесе оставка и даде објаснување за својата одлука

Неколку часа по победата која ја оствари Македонија над Фарски Острови во завршното коло во Лигата на нации, цела македонска спортска јавност зборуваше за историските бројки на нашиот национален тим, но во моменти на голема еуфорија, пристигна и веста за промена во врвот на ФФМ.

Фудбалската Федерација на Македонија информираше дека Муамед Сејдини си поднел оставка и дека истата ќе биде потврдена на Вонредното изборно собрание кое ќе се одржи на 22-ри декември, на кое ќе биде избран и нов претседател на ФФМ.

– Управниот одбор на ФФМ закажа Вонредно изборно собрание за избор на претседател на Фудбалска федерација на Македонија на 22.12.2024 година;

– На Вонредното изборно Собрание на ФФМ на 22.12.2024 ќе се констатира оставката на актуелниот претседател на ФФМ, Муамед Сејдини и ќе се избере претседател на Фудбалската федерација на Македонија, – гласи објавата на ФФМ, во која е приложена и изјава на досегашниот претседател Сејдини.

– После седум извонредни години исполнети со историски достигнувања, решив да се повлечам од позицијата претседател на Фудбалската Федерација на Македонија. Одлуката е резултат на моето размислување дека дојде момент за промена, после период што ќе остане запаметен како најуспешен во историјата на нашиот фудбал.-

– Заедно со вас, испишавме златни страници за македонскиот фудбал: историското учество на Европското првенство ЕУРО 2020, второ место во квалификациската група за Светско првенство и незаборавната победа над Италија во Палермо, успесите во Лигата на нации со пласман во Лига Б и реализацијата на бројни инфраструктурни проекти во соработка со УЕФА и ФИФА.

– Ја напуштам оваа позиција со гордост и огромна благодарност до сите кои придонесоа за овие успеси: фудбалерите, селекторите, клубовите, инвеститорите, администрацијата, членовите на Управниот одбор и секој љубител на фудбалот. Јас ќе продолжам да ја извршувам својата улога до 22. декември, кога на Вонредно Собрание ќе биде избран мојот наследник. Со целосна верба во иднината на Федерацијата и македонскиот фудбал, од срце ви благодарам за поддршката и соработката во изминатите години, – гласи обраќањето на Сејдини.