„Бомба“ од Битола: Кузмановски стави потпис на договор со македонскиот шампион! (Фото)

Филип Кузмановски денеска спогодбено се раздели со Вецлар и стави крај на својата авантура во овој клуб, но воедно стави крај и на својата авантура во германската Бундеслига.

Македонскиот репрезентативец самостојно побарал да си замине од Вецлар и тоа го откри директорот на клубот, а неполни два часа по објавената вест од Германија, пристигна „бомба“ од Битола.

Фантастичниот бек се договори со Еурофарм Пелистер и ќе биде огромно засилување за актуелниот македонски шампион, кој со официјално соопштение и откри на јавноста дека Кузмановски ќе биде претставен на 20-ти ноември.

– Ни претставува особена чест и задоволство да ја информираме јавноста дека од денес нов член на Еурофарм Пелистер е македонскиот репрезентативец Филип Кузмановски. Процесот на обединување на македонските репрезентативци и квалитетни странски засилувања продолжува и враќањето на нашиот поранешен член е одлука која оди во тој правец.

– 27-годишниот Кузмановски е дете на Пелистер, сите ракометни чекори ги направи во Битола и доби афирмација во нашиот дрес. Потоа се пресели во Металург, кратко играше во Еурофарм Работник, па се одлучи за интернационална кариера. Кузмановски избра германски предизвик и ја искуси Бундеслигата. Една сезона го носеше дресот на Магдебург, па три сезони настапуваше за Хановер, а од јануари годинава го носеше дресот на Вецлар.

– Филип Кузмановски наскоро ќе му се стави на располагање на стручниот штаб и неговото деби се очекува да биде во Суперлигата, а потоа и Лигата на шампионите. Официјалното претставување на Кузмановски како нов ракометар на Еурофарм Пелистер е закажано за понеделник 20 ноември, – гласи објавата на Пелистер.