Болт прогнозираше како би завршила трка меѓу него и Роналдо на тартанот и изненади со заклучокот

Јусеин Болт постави нестварни рекордни на делниците од 100 и 200 метри на кои тешко дека некој во  поскоро време ќе им се доближи, или пак собори, но легендарниот Јамајканец како гостин во програмата на спортскиот викенд на „Марка“ привлече посебно внимание со една интересна изјава.

Болт направи виртуелно интервју за домаќините на спортскиот викенд во шпанската престолнина и е само една од многу спортски ѕвезди кои се приклучија во ова шоу, но сепак оваа вечер тој посебно дојде до израз поради споредбата која ја направи меѓу себе и Кристијано Роналдо.

Легендарниот Болт вели дека многу го почитува Португалецот поради сето она што го направи во фудбалот, но и поради фактот како се чува и негува на своја возраст.

Јусеин во своето обраќање отиде и чекор понапред, прогнозирајќи дека во овој момент би загубил од Кристијано ако ги одмерат силите на тартанот.

– Кристијано би победил со комплетна сигурност, бидејќи тој и натаму е активен. Напорно работи секој ден и за мене тој е супер-атлета. Секогаш е на највисоко ниво, работи многу напорно и максимално е концентриран на теренот. Мислам дека во овој момент е побрз од мене и ќе ја добие трката, – вели 34-годишниот Јамајканец.