Боли е незадоволен од мнозинскиот сопственик на Челси, бил и против отказот за Покетино

Тод Боли не е задоволен од актуелното менаџирање на Челси и останува заинтересиран да стигне до управување со мнозинскиот пакет акции во англискиот клуб.

Американскиот бизнисмен поседува само 12,8 проценти од акциите на клубот и не е задоволен од одлуките кои ги носи мнозинскиот сопственик, фондот „Клирлејк Капитал“, а не се согласувал и со одлуката да биде отпуштен Маурисио Покетино.

Двајцата претставници на компанијата го надгласале Боли за многу одлуки, а тој е лут и поради фактот што клубот не работи на планираното реновирање на стадионот „Стемфорд Бриџ“.

Други инвеститори веќе му понудиле на Боли да му помогнат да ги откупи акциите од „Клирлејк Капитал“ и да продолжи да го менаџира клубот, но засега другата страна не покажува интерес да се ослободи од сопственоста на лондонскиот состав.

„Клирлејк Капитал“ има 61,6 проценти од акциите, додека по 12,8% имаат Боли, Хансјорг Вис и Марк Волтер, при што последните двајца засега не заземале страна во тивката војна во конзорциумот.

Во 2022 година актуелните сопственици на акциите платија 2,5 милијарди фунти за Челси.