Богатиновски „грмеше“ на светското првенство во Бахреин

Македонскиот картинг возач Петар Богатиновски достојно ја претставуваше Македонија на светското првенство во картинг кое се одржа во Бахреин, а на кое тој се пласираше како шампион на Централно-европската зона на ФИА (ЦЕЗ), која е составена од 14 земји.

Откако отпатува за ова натпреварување, 12-годишниот Богатиновски во Манама мина низ неколку квалификациски трки, за конечно да влезе во финалето од 36 најдобри, поточно ја стартуваше трката од 32 место. Во нејзините 14 круга тој успеа да напредува фантастични 17 позиции и да заврши на 15 место, а откако некои негови ривали добија временски казни поради некоректно возење, Петар изби на 13 место, со 11 секунди задоцнување зад победникот Арата Ендо од Јапонија.

Според информациите од таборот на Богатиновски, ова е последна сезона во класата 125 Мини Макс, па од следната сезона Петар ќе атакува на нови успеси во повисоката старосна категорија.