Бобан распали по Французинот: Тео заслужува ваква казна!

Тео Ернандес реагираше крајно наивно и неприфатливо за највисока сцена во Лигата на шампиони, па неговиот црвен картон до толку голема мера се одрази негативно, што на крајот Милан претрпе елиминација уште во првата нокаут рунда.

Феенорд максимално профитираше од исклучувањето на Тео кој беше исклучен поради симулирање од Марчињак, а иако неколку негови соиграчи застанаа во одбрана на левиот бек, легендарниот Звонимир Бобан без влакна на јазикот распали по дефанзивецот.

Хрватот го обвини Тео за елиминацијата на Милан и не може да верува дека ниту еден човек во клубот не се погрижил да го коригира неговиот однос, кој овојпат го чинеше тимот рана елиминација во најелитното натпреварување.

– Тео Ернандес ова го прави со години и заслужи ваква казна. Шокиран сум што никој во клубот не му кажува што треба да прави, но и што никој не го поправи неговото однесување на теренот. Вториот жолт картон кој го доби за симулација е апсурден. Тоа е непристоен и неспортски потег. Едноставно не правите такви работи на теренот.

– Од стартот на сезоната гледаме Тео кој нема ништо блиско со играчот кој сите го знаеме. Тој едноставно е некативен, изгледа како да не сака ниту да се обиде да направи нешто, – критикува Бобан.