Бобан на голема врата се враќа во хрватскиот фудбал (Фото)

Динамо има навистина турбулентна сезона и исклучително потпросечна за фудбалскиот великан од Загреб, а во тешките моменти, навистина мора да се носат и тешки одлуки.

Во текот на оваа недела, Динамо ја извести јавноста дека ја прекинува соработката со Фабио Канаваро кој не успеа да ги исполни очекувањата од почетокот на 2025-та година, но новата тренерска смена не е единствениот проблем кој ќе мора да го решава Динамо во летниот преоден рок.

Јасно е дека актуелниот тим на Динамо ќе претрпи посериозни промени, но новитети ќе има и на директорските позиции, на кои се враќа сега една жива легенда на клубот.

Звонимир Бобан во текот на нареднава недела ќе биде претставен како нов директор од страна на Управниот одбор, а допрва ќе се одлучува за тоа каква улога и каква функција ќе добие.

– Љубовта кон еден клуб не познава граници. Љубота кон еден клуб не познава препреки. Љубовта кон клубот ги спојува сите оние кои сакаат еден клуб. Денеска ја повикав нашата „сина“ легенда да се врати активно во хрватскиот фудбал, поточно во Динамо.

– Откако го демократизиравме нашиот клуб, Звонимир Бобан го прифати повикот да се врати во својот еден и единствен клуб, Динамо. Звоне, добредојде дома, – гласи изјавата на претседателот на Динамо, Велимир Зајец.