„БиБиСи“ го откри протоколот пред продолжувањето на сезоната во Премиер лигата: Дезинфекција на топките, терените, тестирања два пати неделно…

Британската влада пред два дена соопшти дека ќе биде дозволено враќање на спортот во земјата од 1 јуни.

Челниците на Премиер лигата за таа цел изготвија посебен протокол кој го испратија до сите клубови и истиот ќе мора стриктно да се почитува.

Во протоколот е посочено најстриктно да се почитуваат правилата за социјална дистанца, а на тренинзите ќе биде дозволено да има најмногу пет играчи кои ќе тренираат не подолго од 75 минути.

Фудбалерите и сите инволвирани ќе се тестираат два пати неделно, а пред тренинзите задолжително ќе им биде мерена и температура.

За почеток на фудбалерите ќе им биде забрането да се собираат во заеднички простории и заедно да доаѓаат на тренинзите.

По секој тренинг топките, стативите, корнер знаменцата и сите потребни реквизити ќе бидат дезинфицирани со цел да се избегне евентуално ширење на вирусот.

Дел од овие мерки би требало да траат во следните 10 до 14 дена, а потоа некои од нив ќе попуштат, па ќе бидат дозволени и собирања на играчите во групни тренинзи.