Беса го врати Реџепи од Шкендија, но донесе и засилување во нападот (Фото)

Беса издоминира во Втората македонска фудбалска лига минатата сезона и заслужено се најде во елитата, но за да се задржи таквиот статус, јасно е дека ростерот мора да биде доста побогат.

Клубот од Добри Дол реши во својот тим да врати добро познато име во Гостивар, дефанзивецот Алмир Реџепи кој вчера го раскина договорот со Шкендија.

По една година во Тетово, Реџепи се враќа во редовите на Беса, а поради искуството кое го насобра во изминатиот период, се очекува да биде големо засилување на левата бековска позиција.

Фудбалерот роден во Тетово има 23 години и се очекува да добие многу поголема минутажа во Беса, тим кој немаше добро отворање на сезоната во Првата лига со забележани два порази.

Поради тоа, клубот во ист ден донесе и засилување во нападот, односно Илирид Адеми кој има богато интернационално искуство, но и настапи во Првата лига како член на Шкупи, Ренова, Гостивар и Македонија Ѓорче Петров.