Белград ќе чека нова шанса, Ф4 турнирот во Евролигата првпат ќе биде организиран надвор од Европа

Белград очекуваше да ја добие организацијата на завршниот турнир во кошаркарската Евролига, но истата сепак ќе ја добие Абу Даби.

Првпат фајнл-фор турнирот ќе се игра надвор од Европа, односно во Обединетите Арапски Емирати, а српските медиуми тврдат дека одлуката паднала поради финансиската понуда на победникот.

Клубовите-акционери во Евролигата гласале околу името на домаќинот на завршниот турнир и само Реал Мадрид и Олимпијакос биле против организација на истиот во Абу Даби.

Турнирот на најдобрите четири екипи ќе се одржи од 23 до 25 мај следната година, а очекувањата се дека домаќин ќе биде „Итихад“ арената, која има капацитет од 18.000 гледачи.

Белград ќе мора да почека за нова шанса да биде организатор на турнирот, кој се одржа во српската престолнина во 2018 и 2022 година.