Барселона веќе има договор со најпосакуваното засилување во нападот

Новиот тренер на Барселона, Чави Ернандес, ќе се обиде да го засили тимот во наредните преодни рокови и покрај комплицираната и неповолна финансиска состојба на клубот.

Чави веќе ги избрал најпосакуваните играчи, а за офанзивните задачи го посакува Феран Торес од Манчестер Сити.

Според „Марка“, Барса веќе има договор за личните услови со шпанскиот репрезентативец и Торес би сакал да се пресели на „Камп Ноу“, но за тоа ќе се прашува и англискиот клуб.

Торес сакал да се врати во Шпанија и Ла Лига, каде претходно настапуваше за Валенсија и преку својот агент дал зелено светло за понудата на каталонскиот гигант.

Во моментов Торес не настапува за својот актуелен клуб, откако заработи фрактура настапувајќи за Шпанија на финалниот турнир на Лигата на нации.