Барселона следната недела ќе информира тројца фудбалери дека не се во плановите на Чави

Почетокот на преодниот рок значи и нова шанса за Барселона да се обиде да го засили составот и покрај комплицираната финансиска ситуација, а еден од начините е и преку разделба со дел од ѕвездите со високи плати.

Како што пренесува „АС“, тренерот Чави веќе го информирал раководството на кои фудбалери дефинитивно нема да смета следната сезона, а сега спортскиот директор ќе треба да им ја пренесе информацијата на самите играчи.

Матеу Алемани следната недела ќе информира тројца фудбалери дека треба да бараат нова средина, а на списокот се Френк Кеси, Ансу Фати и Феран Торес.

Кеси веќе одамна бара нов клуб преку своите агенти и се чини најлесно ќе замине од „Камп Ноу“, додека во случајот со Фати клубот ќе мора да добие поддршка од агентот Жорге Мендеш во убедувањето дека најдобро за него е да замине во друг клуб.

Следната дестинација на Феран Торес може повторно да биде Премиер лигата, а шпанскиот репрезентативец ќе донесе и одредена загуба поради трансфер сумата која му беше платена на Манчестер Сити.