Барселона славеше во шпанската пресметка, Фенербахче со нова победа ја заокружи двојната програма во Евролигата (ВИДЕО)

Тимот на Барселона се избори за тримф над Басконија од 71-57 во шпанската пресметка во рамките на 28. коло во Евролигата.

Чуден беше мечот во „Палау Блауграна“ пред се во првото полувреме во кое домаќините ја добија првата четвртина со 25-4 за да во втората гостите возвратат со 22-8. Во продолжението ситуацијата беше поинаква, немаше вакви драстични осцилации во играта, а избраниците на Јасикевичиус беа подобри и ја потврдија лидерската позиција на табелата.

Миротиќ запиша дабл-дабл од 18 поени и 10 скокови, Хигинс додаде 13 кошеви, а по девет имаа Дејвис и Ханга. Кај поразените Фол и Геидраитис дадоа по 12, односно 11 поени.

Фенербахче пак двојната програма во оваа седмица ја комплетираше со втора гостинска победа, односно по Милано пред нив падна и Асвел (90-86). Де Коло продолжи да блеска  и уфрли 24 поени, Пјер и Гудуриќ реализираа по 13 кошеви.

На останатите средби Олимпијакос го одбрани домашниот терен против Звезда, додека Алба и Милано беа подобри од Химки и Жалгирис.