Барселона сериозно работи за да го комплетира трансферот, Шчесни се јави со прв коментар

Барселона сериозно работи и преговара со луѓето на Војчех Шчесни за да го врати Полјакот од пензија, односно да го доведе како адекватна замена за Марк Андре Тер Штеген до крајот на штотуку започнатата натпреварувачка сезона.

Каталонскиот гигант го пикираше доскорешниот голман на Јувентус како прв фаворит и прави се што е потребно за да го приближи до тимот на Ханси Флик, па додека Шпанците пишуваат за двата услови кои треба да се исполнат, „Мундо Депортиво“ ја извлече и првата изјава од искусниот чувар на мрежата.

Каталонскиот медиум е најупатен во преговорите и уште утрово откри дека истите се на добар пат, па истиот успеа да добие и краток коментар од Шчесни.

Полјакот се обидел да остане резервиран и да не додава масло на огнот, не пропуштил да му посака се најдобро на Тер Штеген пред кого е сериозен и долг процес на рехабилитација.

– Само се надевам дека Марк ќе се опорави брзо, тој ми е добар пријател и станува збор за извонреден голман. Му посакувам се најдобро, можам да го искоментирам само тоа во овој момент. За останатото не би сакал да додавам ништо повеќе, – изјавил Шчесни кој очекувано чека разврска на целата ситуацијата, особено поради фактот што е подготвен за враќање на терените.