Барселона рутински со Асвел, Звезда прва го освои теренот на Олимпијакос (ВИДЕО)

Кошаркарите на Барселона остварија рутинска победа над Асвел од 84-71 во средбата од 23. коло во Евролигата.

Клубот од Каталонија од четвртина во четвртина ја зголемуваше предноста, па по 30 минути игра имаше позитива од 68-50 со што стана јасно дека последниот период ќе биде само потврда за добро завршената работа.

Ова за Барса беше 17 славје, а истото го предводеше Лапровитола со 20 поени, Миротиќ беше автор на 16, а центарот Дејвис на 11 кошеви. Фал и Окобо на спротивната страна искомбинираа 37 поени.

Црвена Звезда пак е првата екипа која го освои теренот на Олимпијакос во актуелнава сезона. „Црвено-белите“ од Белград славеа со 76-72 со што сега останува само Реал Мадрид како единствена непоразена домашна екипа во ова натпреварување.

Дуото Калиниќ-Добриќ беше најфикасно со вкупно 26 поени, кај поразените залудни беа 20 кошеви на Везенов.

Средбата меѓу Макаби ТА и Фенербахче беше одложена, додека Зенит славеше над Андолу Ефес со резултат 76-67.