Барселона има отворен пат за наследникот на Бускетс, каталонците ќе се ослободат од еден дефанзивец

Барселона има огрничени финансиски ресурси, па истите ќе се обиде да ги искористи на најдобар начин и со тоа му овозможи на Чави Ернандес што покомпетитивен тим во наредната сезона.

Заминувањето на Серхио Бускетс е голем проблем за Барселона особено ако се земе во предвид тоа што не можат да се исполнат главните цели, замисли на Чави, ангажмани на играчи како Зубименди или Кимих, а не се реализираше ниту опција Брозовиќ.

Се бара некое поевтино, привремено решение и се чини тоа ќе биде Ориол Ромеу, играчот кој беше дел од Ла Масија и во минатото настапуваше за втората екипа. Ромеу е дел од Џирона, клуб со кој има договор во кој откупната клаузула изнесува 10 милиони евра.

Барса не сака да ја плати таа сума, поточно ќе разговара со соседот и ќе понуди решение за намалување на истата. Тоа што е позитивно е дека Ориол е подготвен да каже „ДА“, односно тој е спремен да се врати на „Камп Ноу“. Договорот би бил на две плус една година што значи идентичен со Илкај Гундоган.

Во исто време шпанскиот шампион решава и други задачи и според „Спорт“ клубот може да го напушти Ерик Гарсија. Се работи за позајмица во Бетис, тим во кој би добил далеку поголема минутажа и би бил постандарден. Конкуренцијата во сегашната средина е голема, а истата ќе биде „збогатена“ со ангажманот на Ињиго Мартинез кој е завршена работа, поточно се чека само официјална промоција.

Деко кој сега има значајна улога во великанот сака екипата да има четворица стопери (Кунде, Араухо, Кристенсен, Мартинез), два леви бека (Балде и Алонсо) и еден десен бек, специјалист за таа позиција. Иако се споменува Жоао Кансело како опција, во моментов далеку пореална е можноста за трансфер на Иван Фреснеда од Валјадолид.