Барселона го отпушти Нето и ги шокираше фановите со неговата замена

Кошаркарската секција на Барселона донесе две интересни одлуки во ист ден, а првата и поочекувана е разделбата со еден кошаркар.

Се работи за Бразилецот Раул Нето, кој одигра само два натпревара и поради проблеми со повреди не успеа да се наметне во шпанскиот клуб, по што сега е ослободен од обврските од страна на евролигашот.

Она што ги шокираше фановите на Барса е изборот за негов наследник, а тоа е Томас Ертел, играчот кој веќе го носеше сино-црвениот дрес и на контроверзен начин се раздели со Каталонците.

Ертел бил во игра и по сериозната повреда на Нико Лапровитола, но раководството тогаш отстапило од првичната идеја, плашејќи се од негативна реакција кај фановите.

По заминувањето на Нето очигледно морала да се активира оваа комбинација, па Ертел потпишал до крајот на сезоната.

Французинот беше без ангажман откако во ноември се раздели со кинескиот тим во кој настапуваше и формата ја одржувал со индивидуални тренинзи. Во минатото ги разбесни сите во Барса откако клубот дозна дека тајно преговара со Реал Мадрид, потег поради кој беше исфрлен од тимот, а потоа и навистина потпиша за големиот ривал.