Барселона добива добри вести пред мечот со Лас Палмас

Барселона со триумфот над Брест од 3-0 ги заборави неуспесите против Реал Сосиедад (1-0) и Селта Виго (2-2) во домашниот шампионат, но време за одмор нема, распоредот е згуснат и веќе за два дена каталонците имаат соочување со Лас Палмас.

Ова е дуел на кој се освен победа на Барселона ќе биде големо изненадување, поточно домаќините реално не смеат да си дозволат повеќе да губат бодови затоа што Реал Мадрид е веќе зад нив, им дише во врат и се што градеа во минатиот период може да се „фрли во вода“.

Пред новиот лигашки натпревар лидерот во Примера ќе добие добри вести кои дефинитивно ќе го израдуваат тренерот Ханси Флик кој ќе добие две „нови“ опции во нападот. Имено Ламин Јамал и Феран Торес се очекува да добија зелено светло и да се најдат на списокот на повикани играчи.

Јамал се повреди пред репрезентативната пауза, Торес претходно, меѓутоа двајцата се во завршницата на рехабилитацијата и треба максимално да се стават на располагање.

Барса ја очекуваат доста средби во следниов период и Флик сигурно ќе има потреба да ротира и затоа му се потребни што повеќе фудбалери на располагање.