Балотели пред шокантен и чуден трансфер во Шпанија

Марио Балотели се огласи пред десетина дена и најави дека се уште чека понуда од клуб кој се натпреварува во Серија А, но исто така не им ја затвори вратата и на клубови кои се натпреваруваат надвор од неговата родна земја.

Иако главна желба му беше да биде дел од елитата во Италија, како што стојат работите „Супер Марио“ е пред нов интернационален трансфер, но истиот ќе биде најчуден и најнеочекуван во неговата досегашна кариера.

Искусниот 34-годишен напаѓач очигледно е подготвен и за авантури кои не се карактеристични за елитните фудбалери, бидејќи како што информираа угледните шпански медиуми, тој е во напредни преговори со Интерсити.

Клубот од Аликанте се натпреварува во третата шпанска лига и сака да предизвика вистински потрес со ангажманот на Балотели, кој во прв момент дал зелено светло за старт на преговорите.

Според информациите на угледниот „АС“, малиот шпански клуб има големи очекувања и се надева дека ќе успее да го наговори Балотели, кој во овој момент е поблиску до преселба во Шпанија од било која друга земја во светот.

„АС“ вели дека добиените информации алудираат на тоа дека операцијата не е целосно завршена, но двете страни се на иста фреквенција и многу брзо може да дојде до сензационален договор.

Последен клуб на Балотели беше Адана, а претходно во кариерата настапуваше за Интер, Манчестер Сити, Милан, Ливерпул, Ница, Марсеј, Бреша, Монца и Сион.