Бајиќ: Најважна е победата, ова ќе биде сјајна екипа во иднина

Македонската сениорска кошаркарска репрезентација славеше над Швајцарија со 67-61 во вечерашниот натпревар во СЦ „Јане Сандансски“, победа со која сме многу блиску до квалификациите за Светското првенство во 2023 година.

Нашиот национален тим е подобар во меѓусебниот дуле со Швајцарија и едноставно ќе треба да се случи чудо да не продолжиме во наредната фаза. Селекторот Драган Бајиќ е задоволен од триумфот и се надева дека турнирот во Скопје ќе го заокружиме и со славје против Словаците во среда од 19 часот.

-Морам да им честитам на момците, одговорија на задачите кои ги поставив за мечот. Морам да бидам презадоволен од тоа прво полувреме и од самиот меч во кој противникот го спуштивме на 60 поени. Нервозата се јави во вториот дел. Но таа е сосема нормална во вакви важни натпревари. Не ја гледам разликата, најважна е победата. Овие кошаркари покажуваат напредок од меч во меч и сигурно е дека ова ќе биде една сјајна екипа во следниот период.

-Публиката беше голем ветер во грбот за нас. Во последните две минути момците покажаа карактер. Се фрлаа на паркетот, имаа контрола на скокот и во одбраната. Тие се виновни за овој резултат кој го имаме. Ни останува уште еден натпревар до крајот, се надевам дека и тој ќе го победиме, -рече Бајиќ и додаде:

-Кога говорам за трите натпревари кои ги одигравме досега, задоволен сум од одбраната. Мора да бидеме свесни за квалитетот на тимот кој го имаме во моментов. На пример, на плејмејкерската позиција го имаме младиот Николов кој немаше ни 45 минути во МЗТ, а доби голема улога да игра натпревари за репрезентацијата. Се трудам тој да напредува и работам со него, тој е одличен играч. Напаѓачки, треба да ги поправиме работите, вечерва беше многу подобро во однос на оној прв меч со Швајцарија. Знаевме да ги казниме сите грешки. Но, не смееме да имаме таква нервоза додека играме важен меч, посебно кај некои играчи кои се поискусни, -заврши нашиот предводник.