Баерн испратил втора, подобрена понуда за Кејн

Баерн Минхен продолжува да притиска за потписот на Хари Кејн, а денеска бундеслигашот испратил и втора понуда до Тотенхем.

Очекувано, германскиот првак ја подобрил финансиската страна на понудата, па на премиерлигашот му се понудени 80 милиони евра, плус дополнителни бонуси кои би можеле да се активираат во иднина.

Претходната понуда беше за 10 милиони пониска во основниот дел, а сега останува да се види дали Тотенхем ќе го промени ставот за својата најголема ѕвезда.

Угледниот германски новинар, Флоријан Плетенберг тврди дека Баерн има добиено зелено светло од Кејн за оваа акција, односно англискиот репрезентативец прифатил да се пресели во Минхен, во случај двата клуба да постигнат договор за трансферот.

Неколку лета наназад Кејн е поврзуван со конечно напуштање на Тотенхем, но се чини дека овој пат Баерн е најблиску до реализација на ваков трансфер.