Баер Леверкузен се засили со фудбалер на ПСЖ

Германскиот шампион Баер Леверкузен реши да ја засили одбраната со фудбалер на ПСЖ, кој првично ќе дојде на заем.

„Лекип“ денеска потврди дека Норди Мукиеле ќе го напушти Париз и ќе ја засили дефанзивната линија на бундеслигашот, со напомена дека во договорот на двата клуба засега нема опција за откупување на договорот.

Мукиеле не добиваше сериозна минутажа кај тренерот Луис Енрике и беше јасно дека клубот нема да му прави проблеми во моментот кога ќе најде заинтересиран клуб, па затоа и ПСЖ лесно ја договорил соработката со Баер.

Французинот има четиригодишно искуство во Бундеслигата каде го носеше дресот на РБ Лајпциг, па веројатно и не му било тешко да се одлучи за ваков потег, посебно што Баер е актуелен шампион, има квалитетен состав, а ќе игра и во Лигата на шампионите.

Останува уште Мукиеле утре да ги помине лекарските прегледи за официјално да биде промовиран од „фармацевтите“, а со тоа ќе биде уште еден играч кој го напушта ПСЖ ова лето.

До крајот на преодниот рок се очекува да биде потврден и трансферот на Угарте во Манчестер Јунајтед, заминува и Екитике, а најверојатно и Милан Шкринијар за кого најзаинтересиран е Ал Наср.