Баер Леверкузен решил да се откаже од еден од најважните играчи во шампионскиот тим

Новиот германски шампион Баер Леверкузен почнува да ја реализира трансфер стратегијата во преодниот рок во кој тренерот Чаби Алонсо сигурно ќе се обиде да го освежи својот тим, но тоа подразбира и разделба со дел од играчите.

Германските медиуми тврдат дека „фармацевтите“ решиле да му дозволат заминување на одличниот дефанзивец Џонатан Та, кој во моментов е дел од германската репрезентација на европскиот шампионат.

Та самиот најавил дека сака нов предизвик и се шпекулира дека тоа подразбира трансфер во најголемиот ривал, Баерн Минхен, а раководството донело конечна одлука дека нема да му пречи да замине со соодветна отштета.

Договорот на дефанзивецот истекува следното лето, па Баер не сака да се доведе во ситуација да го загуби без никаква отштета, ситуација која ќе му овозможи на Баерн да го добие за помала сума од реалната на пазарот.

„Скај“ тврди дека Баерн веќе ги има договорено личните услови со Та, но сега ќе треба да преговара и со неговиот клуб и да најде компромис со оглед на фактот дека првичната проценка за неговата вредност е 40 милиони евра.