Бабак го посочи клучот за поразот: Ги имавме Македонците…..

Томаш Бабак беше еден од најдобрите играчи на Чешка на двата бараж дуели за пласман на Светското првенство, па откако изјави дека шансите се 50:50 по првиот меч кој се одигра во Злин, сега имаше збор пред чешките новинари и по поразот во Скопје.

Македонија ја искористи огромната поддршка од навивачите и ракометарите имаат ветер во грб во победата од 27:25, триумф кој ни го продолжува континуитетот на големите ракометни натпреварувања.

На спротивната страна, Чесите доживеаја ново големо разочарување кога се во прашање Светските првенства, и тоа само три месеци по извонредното издание на Европското првенство каде одиграа и реми со подоцнежниот шампион, селекцијата на Шведска. Бабак за домашните медиуми порачал дека тешко е да се прифати поразот од Македонија, особено кога тој и соиграчите дојдоа на само еден гол од реми кое ќе ги однесеше на мундијалот.

– Секако дека се надевавме дека ќе извлечеме подобар резултат од првиот натпревар во Злин. Ќе беше подобро да победевме дома, но стигнавме до реми и знаевме дека имаме шанса.

– Одигравме добро и во Скопје, но за жал потфрливме во клучните моменти од средбата. Тоа е вистинска штета, знаевме дека ги имаме Македонците, но на крајот не успеавме, – жали Томаш Бабак.