Автобусот на Чаир каменуван во Битола: Овој вандалски чин е спротивен на вредностите на спортот (ВИДЕО)

Чаир 2030 во драматичен и неизвесен меч доживеа пораз од Пелистер со 77-73 на средбата во првата кошаркарска лига во Македонија.

Мечот се решаваше во последната минута во која домаќините со серија од 7-0 дојдоа до предност која беше недостижна, а со тоа и до славје во салата „Боро Чурлевски“.

По средбата скопскиот тим се пожали на навреди, говор на омраза и фрлени предмети кон играчите за да потоа од Чаир стигне и информација дека нивниот автобус бил каменуван во Битола на заминување.

-При враќањето на нашиот тим, автобусот беше нападнат со камења, предизвикувајќи материјална штета и загрозувајќи ја безбедноста на нашите играчи и тимот.

-Овој вандалски чин е апсолутно неприфатлив и е спротивен на вредностите на спортот и почитта меѓу клубовите. Ние најостро го осудуваме овој напад и апелираме до надлежните органи веднаш да преземат мерки за обезбедување на безбедноста на сите учесници во спортските натпревари.

-Кошарката е игра која треба да обединува, а не да разделува. Посветени сме, и покрај ваквите провокации, да го продолжиме нашиот пат со достоинство и професионализам“, стои во соопштението на чаирчани.