Австријците го „замрзнаа“ несуденото засилување на Рома

Австриската фудбалска репрезентација ги започна подготовките за претстојните обврски во Лигата на нации, а овојпат во комбинација за настап нема да биде Кевин Дансо.

Одличниот дефанзивец поминува низ драматичен период, во кој му пропадна трансферот во Рома, а сега е „замрзнат“ и од селекторот Ралф Рангник.

Дансо пристигна во Рим и требаше да ги мине лекарските прегледи, но рутинскиот дел од целиот трансфер се покажа како проблематичен за Австриецот и тој беше вратен во редовите на Ленс, каде ќе остане и во новата сезона.

Австриската фудбалска федерација денеска соопшти дека селекторот Рангник нема да смета на Дансо, а фудбалерот ќе помине вонредни лекарски прегледи во својот клуб во Франција.

Противници на Австрија во септемвриските натпревари се Словенија и Норвешка.