Атлетико договори и петто засилување: Симеоне добива дефанзивец од Барселона

Атлетико Мадрид пред неколку дена заеднички ги презентираше четирите летни засилувања, но по Алварез, Серлот, Галагер и Ле Норман, Диего Симеоне набрзо ќе добие уште едно сигурно, но и уште едно потенцијално засилување.

Самиот аргентински стручњак на денешниот прес со новинарите потврди дека Атлетико Мадрид е во завршни преговори за двајца нови фудбалери, а еден од нив ќе пристигне од редовите на Барселона.

„Колчонеросите“ ги договориле сите детали со Барса за позајмица на Клеман Ленгле, што значи дека францускиот стопер во новата сезона ќе биде дел од ротацијата на аргентинскиот стручњак.

По своето искуство во Премиер лигата, Ленгле повторно не се избори за место во првиот тим на Барселона, но Симеоне очигледно смета дека тој може многу да му помогне во новата сезона.

– Мислам дека ги оставруваме сите замисли на трансфер пазарот. Одиме според тоа што го зацртавме на стартот на летниот преоден рок. Ни недостасуваат уште двајца играчи, но тие набрзо ќе бидат со нас и ќе бидат претставени од клубот, – откри Симеоне.