НБА

Атланта со пресврт го освои „Медисон Сквер Гарден“, Хјустон ги елиминираше „воините“ од НБА Купот (ВИДЕО)

Објавено

на

12 декември, 2024

Од

foto: x.com/NBAspain

Атланта Хокс и Хјустон Рокетс се двете последни екипи кои обезбедија место во полуфиналето на НБА Купот или поточно ќе бидат дел од завршницата која ќе се одржи во Лас Вегас.

„Јастребите“ од Џорџија направија уште едно изненадување и му пресудија на Њујорк Никс, односно го елиминираа од ова натпреварување на негов терен во „Медисон Сквер Гарден“. Поранешниот тим на Перо Антиќ губеше со седум разлика по првото полувреме, но по одморот имаше специјална трета четвртина која ја реализираше со 34:18 и воден од таа евергија, самодоверба успеа да дојде до триумф и полуфинале во кое ќе ги одмери силите со Милвоки Бакс.

Хантер со 24 поени беше прв стрелец, додека дабл-дабл учиноци имаа Џонсон (21 поен и 15 скока, плус 7 асистенции) и Јанг (22 поени, 11 асистенции). Кај Никси комплетната стартна петорка беше двоцифрена, Харт беше лидер со 21 поен.

Хјустон пак по една драма и неизвесна завршница го доби Голден Стејт Вориорс со 91:90. Клучни беа двете погодени слободни фрлања на Грин на четири секунди до крајот. Грин заврши со 12 поени далеку помалку од Шенгун кој беше лидер на „ракетите“ со 26 поени, 11 скока и 5 асистенции. Клубот од Тексас за место во големото финале ќе игра со Оклахома Сити Тандер.

Инаку кај „воините“ Куминга беше прв на листата на стрелци со 20 поени.