Астон Вила ги шокираше фановите со цените на билетите за Лигата на шампионите

Фановите на Астон Вила долго чекаа нивниот тим да обезбеди место во елитната Лига на шампиони, но сега ќе треба да издвојат сериозна сума доколку сакаат да ги следат натпреварите на домашен терен.

Како и сите останати екипи, Вила ќе одигра четири натпревари на својот стадион „Вила Парк“, но навивачките здруженија се шокирани од цените на билетите.

Тие се поделени во три категории и цените се движат од 85 до 97 фунти, при што одреден попуст добиваат сопствениците на сезонски билети.

Вила има во просек најскапи билети меѓу сите премиерлигаши кои ќе бидат дел од Лигата на шампионите, а Ливерпул на пример ќе ги наплатува билетите по цени од 30 до 61 фунта.

– Лојалните фанови на Вила кои го чекаа овој момент 40 години се казнети и понижени. Во споредба со другите клубови, цените објавени од Астон Вила немаат ништо со реалноста, – велат од официјалните здруженија на фановите.

Астон Вила на домашен терен ќе игра против Баерн Минхен, Болоња, Јувентус и Селтик.