Артета воодушевен од највредниот квалитет на Калафиори: Поради тоа го купивме

Микел Артета се чини дека доби извонредно засилување во Рикардо Калафиори, бидејќи надежниот италијански дефанзивец многу брзо се аклиматизираше и почна да прави разлика во тимот на шпанскиот стручњак.

Иако негова природна позиција е стопер, Калафиори во Арсенал игра како лев бек, а тоа му овозможува да има чести излети во средниот ред и да има многу допири со топката.

Италијанецот вчера доби навистина висока оценка од експертите за изданието против ПСЖ  и натпреварот го заврши со 52 допири со топката и 100-процентна успешност на стартови (пет од пет), а исто така имал и пет точни паса во опасниот дел од теренот.

Овие бројки само потврдуваат колку Калафиори може да биде разновиден, па Артета не штедеше комплименти и за него, откако претходно го испофали Каи Хаверц.

– Калафиори има капацитет да опфати повеќе позиции на теренот и навистина е комотен додека го прави тоа. Веќе гледавме како го прави тоа во Италија и поради тоа го купивме.

– Прво и основно, тој е извонреден дефанзивец, секогаш е присутен на теренот и влегува со голема енергија во дуелите. Не се плаши од ниту една ситуација, ја сака топката во своите нозе и среќен е кога се бараат поразлични работи од него, независно од позицијата на која игра, – вели Артета.