Артета спореди ѕвезда на Арсенал со Меси: И Лео секогаш го прави истото

Арсенал отвори со победа на стартот на новата сезона во Премиер лигата и ги припитоми „волците“ на „Емирејтс“, триумф кој го очекуваа сите во стручниот штаб на Микел Артета.

„Топчиите“ беа поагресивни и поконкретни во секој поглед и на крајот славеа со два гола разлика, пред се благодарение на Букајо Сака кој го реши прашањето околу победникот.

Крилниот напаѓач продолжи онаму кадешто застана минатата сезона и повторно се издвојува како кандидат за играч на сезоната во Премиер лигата, а Микел Артета веќе почна да го споредува со Лео Меси.

– Со добрите играчи секогаш е исто. Со Сака е како со Меси, знате дека ќе дојде во позиција за гол и дека ќе ја смести топката во мрежа. Меси го правеше тоа цело време.

– Сака е неверојатен за нас, нема многу играчи како него во светот, а тој се уште е многу млад. Може да биде само подобар, навистина е чудно да се гледа ваква константност кај толку млад фудбалер. Тој дава одговори на секој меч и тоа секоја недела, – вели Артета.