Арсенал преговара со Баерн за трансфер на крилен напаѓач

Фудбалерите на Арсенал се фокусирани на реваншот со Реал Мадрид во Лигата на шампионите, но спортскиот менаџмент веќе сериозно работи на трансферите кои треба да го освежат тимот на Микел Артета следната сезона.

Германски „Скај Спорт“ објави дека „топчиите“ почнале активни преговори со Баерн Минхен за трансфер на Кингсли Коман, крилниот напаѓач кој не е во прв план по доаѓањето на Венсан Компани на клупата на бундеслигашот.

Клубови од Саудиска Арабија се главна конкуренција на Арсенал во преговорите за Коман, но премиерлигашот се надева дека Французинот сепак ќе избере да остане во Европа и да се бори за важни трофеи со тимот предводен од Артета.

Баерн и Коман се на сличен став дека нивната соработка треба да заврши летово, што значи дека клубот и фудбалерот работат во иста насока, а тоа е обезбедување трансфер кој ќе ги задоволи сите инволвирани страни.

Французинот дојде во Баерн во 2015 година и веќе цела деценија е член на германскиот великан, со кого стана и европски клупски шампион.