Арсенал не успеа да го „скрши“ тврдиот Брајтон (ВИДЕО)

Фудбалерите на Арсенал не успеаа да ги освојат трите бода на соочувањето со Брајтон во последниот натпревар од денешната програма во Премиер лигата.

Брајтон е најтврдиот тим во најсилната англиска фудбалска конкуренција и потврда за тоа е што со вечерашниот резултат 1-1 дојде до десеттото реми во шампионатот.

Има само еден пораз на домашен терен и тоа од Кристал Палас што јасно говори дека е тешко да се игра на „Амекс“. Гостите од Лондон водеа од 16 минута со погодокот на талентираниот Нванери, предност која беше активна до 61 минута кога Жоао Педро со удар од белата точка израмни на 1-1 што на крајот се покажа како конечен резултат (ОВДЕ можете да ги погледнете погодоците)

На ова реми дефинитивно се радува лидерот Ливерпул кој сега има пет бода повеќе од „топчиите“, ама и два натпревари помалку што значи дека има можност да се стекне со двоцифрена позитива во трката за пехарот.