Арсенал договори продажба на Рамздејл за 25 милиони фунти

Арон Рамздејл го загуби стартерското место во Арсенал на почетокот на минатата сезона, па една година подоцна, англискиот чувар на мрежата е свесен дека не смее да си дозволи уште едно исто сценарио како она лани.

Рамздејл ја загуби довербата кај Микел Артета и шпанскиот стручњак му даде предност на сонародникот Раја, кој откако беше целосно откупен ова лето, стана јасно дека останува „единица“ во плановите на менаџерот.

Планот на Арсенал е да остане активен на трансфер пазарот до самиот финиш на преодниот рок и се очекува барем уште една интересна операција, но во меѓувреме договори продажба на незадоволниот Рамздејл, и тоа во клуб кој се натпреварува во Премиер лигата.

Повратникот Саутемптон запиша два порази во првите две рунди во Премиер лигата, но како клуб кој инкасираше огромни финансиски средства преку плејофот, сега може да си дозволи голем трансфер како оној на Рамздејл.

„Светците“ се согласиле да платат фиксни 18 милиони фунти за Рамздејл, но целиот пакет може да достигне 25 милиони фунти во вид на бонуси. Продажбата меѓу двата клуба е веќе договорена, а закажани се и медицински прегледи во текот на денешниот ден.