Антонио пикира, Де Лаурентис исполнува: Конте ќе доби добро познато крило од Бразил

Наполи полека влегува во завршната фаза од подготовките за новата сезона, но клубот се уште не знае како точно ќе изгледа првиот тим на почетокот на кампањата во Серија А.

Иако Антонио Конте бараше да ги добие сите засилувања до крајот на месец јули, оваа пракса малку се оддолжи, па така искусниот стручњак ќе го добие новото крило некаде на средина на месец август.

Аурелио Де Лаурентис е доста зафатен со најавената продажба на Виктор Осимен, но во меѓувреме успеал да ја заврши операцијата која Конте ја подвлекол со црвено како многу важна.

Угледните италијански медиуми попладнево информираат дека Конте ќе го доби посакуваното крило, оодносно Давид Нерес кој во минатото беше и редовен бразилски репрезнтативец.

Нерес своите најдобри изданија ги имаше во Ајакс и тогаш сериозно важеше за еден од најголемите таленти во светот, но сега ќе пристигне во Наполи како досегашен член на Бенфика.

„Кориере дело Спорт“ тврди дека Наполи веќе се договорил на петгодишен договор со продорното крило, па сега останува само да се прецизираат последните детали со неговиот клуб.

Бенфика бара 30 милиони евра за својот фудбалер, но Де Лаурентис се надева дека малку ќе се „исценка“ и дека ќе го добие за 25 милиони евра, плус бонуси.