Антонио му купи време на Гарсија: Позната причината поради која Конте го одбил Наполи

Аурелио Де Лаурентис индиректно призна дека преговара со други тренери кога говореше за иднината на Руди Гарсија пред два дена, а веќе вчера пристигна информација дека ја добил и првата „корпа“.

После само два месеци од стартот на сезоната, газдата на Наполи се сомнева во одлуката која ја донесе изминатово лето, но Французинот Гарсија засега го „преживеа“ првиот налет, а главна причина за тоа е Антонио Конте.

Италијанецот му купи време на својот колега со негативниот одговор кој му го дал на Де Лаурентис, а за кој денеска пристигна интересно објаснување од угледната „Газета“.

Конте вчера самиот се огласи и порача дека во моментов само планира да мине квалитетно време со своето семејство, но „Газета“ открива дека зад негативниот одговор на Антонио се крие нешто друго.

Поради своите методи и принципи на работа, Конте смета дека им е потребно време на фудбалерите за да се навикнат на неговите тренинзи, а бидејќи еден од неговите главни услови е да преземе тим неколку месеци пред стартот на сезоната, лесно се справил со Де Лаурентис и понудата која ја добил од италијанскиот првак.